صفنة تماثيل

صفنة تماثيل
اركض ما اطيح وبيه اشمت الكَاع
اومو آنه اليضل
ياهو اليجي يفوته…
واركض بالعكس لوبيه دار الكون
اصير آنه اليهد
والناس مشحوتــه..!!
واكَول الموت عز وعيشة الأحرار
موشغلة اماني…
وكلمه مكبوتـــــــه
وهنيالي من اموت واخلص من الموت
واشيل آنه
انه واركض بتابوتـه…
واصيرن خوف اخوّف وآنه عايش موت
واشحده اليجيني
واهجم بيوتــه…
ميتين المكَابر ما تشيل اسيـــــــــوف!!
بس جيب اليطب
بليل للموتــــه
خليني اعله حالي وارضه اصيرن ليل
ومن يدري..
اشيظم الليل بسكوته؟!!
* * * *
مرات البشر بعيونه حجيه يصيـــــــر
مو كل السوالف واضحه بصوته
التماثيل بطبعهه
الخرس والصفنــــات
وتحجي اشكَد معاني
وهيه منحوته ..
* * * *
وبنادم جذب وبحلكَه ميتْ الســــــان
ياصدكَ الجذب..
والناس مبخوتــــه …
يكلك عالكمر راح وخذاه الحوت
ولا هو النزل لا صعدت الحوته